Category Archives: 雷利衛徑全征78km 2014

1597078_10152305016399497_166841426_o1-150x150.jpg

[雷利練習] 北潭坳至城門水塘

今日係第二個星期跟壞人師兄嘅功課練雙坳(北潭坳至荃錦坳,即麥徑3段至8段),四子約好西貢早餐,突然醫師介紹另一位強跑師兄Tommy俾我哋認識,話會同我哋一齊跑,我先愕一愕然(我事先完全唔知道呢件事),就繼續早餐準備出發。 喺西頁巴士總站搭92號巴士去到北潭坳,已經見到好多練山嘅師兄準備出發,我哋去過廁所,就開始沿樓梯上麥徑3段嘅牛耳石山,因為係剛起步,所以氣力仍然足夠,就一口氣行山去。行到一半,突然見返一個好耐無見嘅中學同學,打過招呼,就繼續一口氣行上去。 由於Freddy今日狀態欠佳,所以我哋就keep住舒服pacing急行,好快就到達企嶺下,時間1小時50分。 今日天氣炎熱,原先計劃係喺企嶺下汽水機補水,但可能人們已經開始練毅行,汽水機內飲品已全部售罄,我哋最後決定坐的士去馬鞍山補水,之後再沿馬鞍山郊遊徑走回麥徑4段,最後到達沙田坳時間為3小時06分。 喺沙田坳食個午飯後繼續起行,上咗一段山仍未見雄哥Freddy,正想放慢速度步行,等咗一陣Freddy雄哥已經慢jog嚟到,咁我都開始慢jog,跑咗一陣就見到醫師同Tommy,但後面已經唔見咗Freddy同雄哥。等咗一陣,就決定先行,最後喺大埔道等埋佢哋。 過埋筆架山,已經唔見咗醫師同Tommy,我就keep住pacing繼續慢跑,嗰段路好似走極都走唔完,還好狀態唔錯,繼續keep住去,最後終於到達大埔道,時間1小時20分。 喺大埔道同醫師等咗一陣,就收到雄哥電話,原來Freddy抽筋,雄哥亦腳痛,佢哋會喺大埔道撤退。醫師夜晚有事要喺城門水塘撤退,我見自己仍然有貨,就繼續跟醫師同Tommy走埋城門水塘(由於我未行過之後路段,都唔敢自己去)。 行過大壩,之後就慢jog上金門路,最後去到燒烤場時間為49分鐘。 分段時間: 1. 北潭坳至企嶺下 : 1小時50分 2. (乘的士至馬鞍山補水)馬鞍山至沙田坳 : 3小時06分 3. 沙田坳午飯 : 29分 4. 沙田坳至大埔道 : 1小時20分 5. 大埔道至城門水塘 : 49分   Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 法藏寺至基維爾營地來回

由法藏寺急步行上沙田坳恆益商店,之後慢jog到基維爾營拆返,再急步行落法藏寺 1. 法藏寺至恆益商店: 00:16 2. 恆益商店至基維爾營: 00:28 3. 基維爾營至恆益商店: 00:21 4. 恆益商店至法藏寺: 00:18   Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 沙田坳道至大尾督

自從上次跟壞人師兄操山,佢指出咗我哋幾個嘅不足之處,而距離雷利比賽剩餘可以操練嘅時間已經唔多(大約只剩返4課),佢建議我哋呢4課好好練好耐力,目標係完成比賽。如果盲目追求速度但最後耐力不足,反而容易因為抽筋、爆碣,甚至受傷以致未能完成賽事,最後佢就開咗功課俾我哋⋯ 星期四新丁班後三子開會(醫師缺席),商量點樣喺剩低嘅時間去操練、比賽當日嘅安排等等⋯原本我哋嘅無定向練習,通通都改為完成壞人師兄俾我哋嘅功課為目標。 第一課 – 沙田坳至南涌,大約48km 今日我哋四子齊人,由於Freddy同醫師上晝有事,所以時間定喺下晝3點喺沙田坳出發。早一晚我已諗定要帶嘅裝備、帶幾多L水。今次路段有兩個補給位:城門水塘燒烤場及太和,所以我估計500ml水應該足夠由沙田坳到城門水塘。 出發前,因為覺得天氣都熱,為安全我都帶多500ml水特。我先喺慈正村三期沿梯級直上做個warm up,上到集合地點等到醫師Freddy嚟到,食住燒賣等埋雄哥,分好Gel之後我哋就馬上出發。 我哋慢jog沙田坳,一到引水道,醫師同雄哥就愈去愈快,我同Freddy無追上去,堅守今日目標:「完成」。3點鐘嘅烈陽消耗,跑太快會消耗體力同水份,我哋就keep住6-7分鐘覺得舒服嘅pacing繼續均速慢jog,盡量保留體力去挑戰最後嘅九龍坑山、黃嶺及八仙嶺。正因為從未試過由沙田坳去到尾,我哋都唔敢隨便消耗體力。 過咗一陣,可能醫師良心發現(講笑),放慢速度喺我哋前面100m左右慢jog,我哋就維持呢個隊形,以分段時間51分鐘到達大埔道。 之後開始進入衛徑6段上山,醫師同雄哥又快步走咗,我同Freddy都唔敢快,上落斜就急步行,平路就慢jog,其間食咗一粒鹽餅(我個新買樽仔唔知幾時自己打開咗,鹽餅都黏住花士令 T.T,所以我食嗰啲係花士令鹽餅),再過一陣慢慢食埋包Gel,無幾耐就到達城門水塘,分段時間58分鐘。 去到城門水塘,水特已經飲晒,而水就只飲咗200ml左右(送Gel同鹽餅),喺城門燒烤場買咗支750ml水同可樂,小休一陣繼續出發,來回堤壩加休息大約21分鐘。 之後再上城門林道,我同Freddy仍繼續急步行,開頭我哋仲見到醫師同雄哥尾燈,再過一陣已經唔見縱影。行到一半,見到Freddy食嘢,咁我都唔執輸,食咗兩件帶嚟嘅青瓜卷,行到鉛鑛坳,會合雄哥醫師小休一兩分鐘,就沿大石陣落去元墩下,到達元墩下分段時間1小時21分鐘。 之後由碗窰轉入衛徑8段,嗰陣已經開始入黑,由醫師帶頭四子同速急步行過樊仙宮及一大段山路之後到達大埔,分段時間55分鐘。 我哋喺大家樂食埋飯,補咗750ml水、帶好頭燈就繼續出發,出發前補多1粒鹽餅,食飯連補給時間大約45分鐘。 嗰陣時間係8:25pm,因為擔心南涌無車走,所以決定大尾督離開。 四子急步進入大埔頭村上九龍坑山,終於開始呢個功課嘅重頭戲。睇住醫師急步上山,平路慢jog,我緊追其後,行咗一大段路,覺得體力仍然充沛,肌肉無任何酸軟感覺,呼吸平穩,就繼續追住醫師到山頂,而雄哥Freddy都緊隨後面,分段時間係57分鐘。 跟住係一大段落斜,開頭嘅大斜路四子仍然一齊急行,但去到稍平位置雄哥醫師又已經唔見人,我就同Freddy繼續慢jog,到達鶴藪水塘分段時間32分鐘。 之後經過水壩及環塘路段我哋仍唔敢快,同Freddy急行調節呼吸,就喺燒烤場會合雄哥醫師開始走上黃嶺。醫師一支箭沖咗上去,我、雄哥同Freddy就急步上。之後覺得隊友速度減慢,我亦唔急於走上去跟住減慢速度,上到山頂等齊人就慢行調節呼吸繼續去。 之後嘅一大段比較「平坦」嘅路段,醫師都係走到好前,我、雄哥同Freddy就繼續慢行回氣,間中都見醫師回頭望返我哋。好快又要上落山,相比黃嶺,呢啲自然比較碎料,但草已經生到好高,仍有一定危險。 之後不斷上山落山,已經唔知過咗幾多個山頭,我雖然不停流汗,但體力仍然足夠,水都仲有500ml(上九龍坑山同黃嶺只係飲咗250ml),已經鐵定可以完成。之後上到純陽峰,精神更加為之一振,就喺中途,雄哥嘅水已經耗盡,我知自己之後已經唔駛再點飲水,就分咗一半俾佢,之後就一鼓作氣走完八仙嶺到達最後一個峰: 仙姑峰。 呢個時候睇睇手錶,12:05am,仲有足夠時間趕最後一班出大埔小巴。我哋就馬上落山,到達山腳醫師同雄哥當然又開快車走咗,我同Freddy繼續急步行,到達大尾督分段時間1小時41分。 全程我哋用咗9小時24分,減去大約1小時休息時間,大約以八個半小時完成。 今次第一次完成咁長路段,雖然時間唔算快,但起碼知道自己做得到,四頭肌及小腿都無乜酸軟疲累,令到我完成比賽嘅信心又跨出大一步。 分段時間: 1. 沙田坳至大埔道 : 0:51:42 2. 大埔道到城門水塘 : 0:58:26 […]

Share
Continue reading »
1597078_10152305016399497_166841426_o1-150x150.jpg

[雷利練習] 法藏寺至基維爾營地來回

原本想加操油塘至沙田坳段,但由於膝頭有啲勞累,所以只做個跑斜路訓練,跑飛鵝山道至基維爾軍營再折返。   Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 大潭至大埔道

星期六跟強跑者壞人師兄試操衛徑,有過上次逆走衞徑的教訓,今次不敢大意,加上我從未試過夜跑,所以除咗星期三跑郵輪碼頭嗰十幾km easy run及星期四新丁班嘅跑姿練習之外,只係全部重量同核心肌肉訓練,前一晚更加一早上床休息,確保操練當日有足夠體力。 當日因為Freddy唔得閒,而我哋又miss咗一班巴士,約同大圍師兄5個人比預定時間4:30pm遲咗差唔多一個鐘頭由陽明山莊附近燒烤場起步進入大潭水塘道。出發後我哋開始慢jog,由於我係第一次跑衛徑1-2段,只係從網頁知道要大上大落,會有難度。可能未暖身,一開始跑得比較辛苦,跑咗一陣之後,已經開始跟到節奏。由於朝早落過大雨,有幾段泥路都有啲滑。喺轉入淺水灣坳後,就開始登上紫羅蘭山,當時太陽仍未落山天氣仍然有啲熱,但仍唔算辛苦,最後返回陽明山莊以分段時間1小時04分完成。 加咗補給繼續前行進入衛徑2段,呢段路亦唔難走,當我哋上渣甸山時已經日落,火燒雲嘅景色真係好靚,落到半山已經天黑,戴上頭燈繼續前進,從未夜間跑山,之前仍然擔心只得一支頭燈照明會唔會照唔到路要減慢速度跑,但試過後原來又唔駛喎,而且只睇到光嘅地方,反而更能好好集中精神,好快已經去到太古,分段時間1小時14分完成。 喺鰂魚涌附近食個飯及補給,就搭地鐵過海。今日狀態唔錯,仲有大量體力,之前嘅腳傷都無痛過,而且之前有練過衛徑3至太和,好有信心可以完成。 之後同阿新師兄會合之後就開始衛徑3段,呢段我近幾個星期都在操練,因此比較有信心,也可以用比較快嘅速度去衝,到達井欄樹用去1小時52分(連搭地鐵時間)。 井欄樹都無停繼續去,一直經過西貢古道、大藍湖路引水道、東洋山(可能乜都睇唔到,反而覺得佢無以前咁難行),到達飛鵝山觀景台,已經係11pm,之後慢jog落沙田坳,去到沙田坳分段時間係1小時34分。 雖然我同皇上緣慳一面,但去到沙田坳已經收到佢為我哋攞上山嘅水同蛋糕,我keep住蛋糕,食咗帶去嘅卷物,補充咗水,就繼續出發。 好後悔無記住前進兄以前講過嘅嘢要慢慢補給,一口氣食晒6舊卷物,跟住嘅一段,跑起嚟就好似想死咁,但仍然死跟醫師同雄哥。離九龍水塘仲有4km,慢慢辛苦感慢慢消失,但雄哥嘅抽筋情況仍無改善,最後就同醫師3個人一齊行咗一段,之後又跑一段,最後商量好在大埔跳車,就叫醫師趕上前叫師兄們先走,我哋喺大埔跳車。 同雄哥行到九龍水塘,見師兄們仍然喺度,跟師兄們商量後,最後醫師跟師兄們繼續去,我同雄哥就跳車,完成時間7小時08分。 PS. 我正奇怪衛徑1段明明寫住一開始要上孖崗山,點解好似唔覺上過山?問醫師先知道原來改咗路線。 分段時間 : 1. 大潭水塘燒烤場至陽明山莊 : 1小時04分 2. 陽明山莊至鰂魚涌 : 1小時14分 3. 搭地鐵過海至油塘再到井欄樹 : 1小時52分 4. 井欄樹至沙田坳 : 1小時34分 5. 沙田坳至大埔道 : 1小時22分 […]

Share
Continue reading »