Category Archives: 雷利衛徑全征78km 2014

result.jpg

雷利衛徑78km全征

經過幾個月嘅山路練習,今日終於完成咗「雷利衛徑78km全征」,完成時間17小時13分,總排名23/298,組別排名11/185,盡晒力起碼對自己都有個交代。 10月11號當日六點幾同雄哥食個早餐,就搭的士到達大潭水塘燒烤場-「雷利衛徑78km全征」比賽嘅起步點。嗰陣七點幾,天氣仍然清涼,四子集合後就去領取號碼布,點名時我由於會錯意(以為每隊要準備1個哨子),結果我要向會場counter買哨子。 總算順利完成登記,寄存好行李,稍作休息已聽到大會宣佈比賽快將開始,我哋馬上到達起跑地點,倒數後比賽正式開始。 一開始已見到大量參賽者一窩蜂跑咗出去,四子就按住大家比較舒服嘅步速,沿住大潭水塘道路慢jog。及後開始上紫羅蘭山,已慢慢開始覺得天氣炎熱,還好間中有山風吹過,仍然唔覺得辛苦,最後跑回陽明山莊,時間1小時。 喺陽明山莊CP1登記後,食咗一隻香蕉及補水,馬上走上衛徑二段渣甸山。可能食完早餐無耐,又或剛才飲水太多,上山已開始頂胃,上到山頂後肚脹感覺先慢慢消失。呢個時候,有隊白衫、著晒Salamon裝備嘅外國人不停同我哋爭持,上山明顯佢哋有較好嘅體力,但落山我哋又有時會過頭,呢個時候呼吸開始覺得辛苦,仲以為自己體能差咗,直到Freddy提醒速度過快,我哋先慢落嚟,最後去到鰂魚涌時間為1小時4分。 去7仔買咗支水動樂,就jog去鰂魚涌站搭地鐵,一到油塘又開始jog出去,去到炮台山SCP1,問工作人員邊個check point仲會有補給,佢話要去到井欄樹,咁我哋只好繼續前行,到達衛徑3段開始點時間28分。 開始入衛徑3段,仲未回到氣,開始嗰段都係急行,行咗幾分鐘之後先開始慢jog,落到澳景路見到有補給,一邊唸唸碎點解連工作人員都唔知補給站喺邊,一邊就食麵包同補水,呢個時候陸續有其他參賽者出現,出發前問工作人員下個補給站,佢哋話係沙田坳,之後我哋沿樓梯上到CP2登記。 登記完繼續出發,由於太陽曬住,天氣愈來愈熱,行起嚟都覺辛苦,好彩仍有山風,加上之前練過烈陽,仍然仲頂得住。 好快差唔多到達井欄樹,前一晚跑友SamSam會下晝1點喺井欄樹做義工,問過我哋要乜嘢補給,醫師答過話要水動樂,但我哋比預期早到,到達井欄樹時間1小時17分。 由於之前CP2嘅義工話要到沙田坳先有補給,加上天氣熱,回覆完SamSam我哋已到達井欄樹,就到附近士多飲汽水。出發後,轉個彎就見到CP3有補給,四子又一輪炒蝦拆蟹後,攞咗Gel、2包PowerBar同電解飲品,補完水就進入西貢古道。 就喺西貢古道其中一段,由於行山杖被樹藤勾咗一下,左腳腳腕扭咗一扭,平衡好身體跑咗兩步,覺得腳腕只係有少少唔舒服,又唔覺得痛,無理到就跟住隊友到達大藍湖路。 食完嗰包大會提供、好重藥水味、好難食嘅Gel後,繼續步行開始走上東洋山,惡夢先正式開始。開頭一段由於仍有樹蔭,雖然上得辛苦,仍然稱得上叫做舒服;點知一離開樹蔭,太陽直曬頭頂,只好死忍,一步步用行山杖慢慢爬上去,行一段就馬上補水,沿途雄哥仍不斷鼓勵我哋。幾經辛苦終於到頂,行到基維爾營門口,發覺我條壓力短褲同小腿套已黐滿晒鹽粒。 喺沙田坳道落斜,Freddy開始抽筋,我哋就停低等醫師幫Freddy按摩大腿,而我嘅4頭肌都作抽筋,即刻噴咗啲噴劑,再不斷彈跳去鬆弛肌肉,好返啲我哋又再出發,落到沙田坳士多時間為2小時2分。 我哋馬上喺CP4登記後就馬上補水,我就攞咗個雪梨補水,之後入士多每人補咗支電解飲品,兩碟飯四個人分,之後又繼續出發。落到引水道,我又中魔咒,跑咗一陣,已經好唔舒服,雄哥見到,就一齊先行500m等我回氣,之後繼續慢jog。慢jog咗一陣,辛苦感覺又返番嚟,唯有死頂,旁邊雄哥不斷鼓勵,我就死頂keep住一口氣繼續跑,好唔容易頂晒成條引水道去到大埔道,時間1小時15分。 之後四人一路慢行到城門水塘等我回氣,去到上城門水塘附近到達CP5,醫師見我成塊面紅晒,就攞水幫我淋身降溫,補完水又繼續出發。降溫後,身體狀況明顯好轉,但由於抽筋感覺仍然隱約存在,唔敢跑得太快,繼續行一段jog一段,到達城門水塘時間為1小時27分。 喺城門水塘CP6登記後,攞住大會派發嘅膠杯要咗一杯熱朱古力,食咗一塊麵包,等雞蓉粟米湯煲好,亦要咗一杯(直頭係未熟好嘅罐頭湯),呢個時候腳瓜瓤已經被臏骨帶磨損晒,就走去醫療站攞膠布,之後繼續出發。 沿城門林道一路急步行,正奇怪行咗咁耐都未遇到一個雷利156嘅參賽者,過咗一陣就開始陸陸續續見到,到咗鉛礦坳去個廁所,就馬上進入大石陣。開頭仍以平時落山方式,一下腳腕突如其來嘅疼痛令我忽然脫力,多得行山杖不致令我跌倒,但已經唔敢再快。 又行咗一陣,發覺用腳踭落地腳腕會無咁痛,又開始加快步速,去到平路同樓梯就更加跑落去,去到元墩下時間1小時32分。 行前啲去CP7登記後,撞到大圍師兄回程,飲咗杯熱朱古力後繼續出發,呢個時候天開始入黑,我哋就停喺小巴站戴上頭燈繼續前行。Mavis係我哋另一位喺太和嘅support,由於已過咗約定時間,到尾段醫師就先跑去會合Mavis,我哋就繼續keep住急行,其間見住好多跑友喺落斜快步過咗我哋,但我哋都keep住速度行,留力準備挑戰最後兩座最甘嘅山峰。 見住好多跑友過我哋頭嘅同時,亦見到好多有用行山杖嘅師兄,記得壞人師兄上次講過我運用到行山杖嘅30%都無,所以就趁佢哋過我哋,我就留意佢哋點用行山杖,好似又有一啲領悟。 去到錦和橋,見到好多參賽者休息補給,喺橋尾見到Mavis已經喺度,我哋食咗佢為我哋帶嚟嘅手卷同寶礦力,稍作休息,合照後繼續出發。 去到大埔頭村,見到大量參賽者喺度補給休息,入廁所洗個面,抖足精神,出發挑戰九龍坑山。當時其實心情好複雜--行咗咁長途,腳已經攰到不能,上完九龍坑山之後,仲有個黃嶺同八仙嶺;但另一種諗法,已經去到九龍坑山,就嚟行完喇~ 當然,為咗要完成,就強迫自己去向好嘅方向諗,一步一步,咬緊牙關頂落去,行到一半,發覺頭燈慢慢暗落嚟(起點檢查頭燈時開過,之後唔記得lock返,燈唔知已經開咗幾耐),醫師見狀,同我交換咗兩粒電池,之後繼續頂住去到九龍坑山頂,時間為2小時23分。 依靠住行山杖,有時jog有時行,好快就到咗鶴藪水塘,喺CP8登記後,趕快食咗一片三文治、一杯熱朱古力,坐咗一陣,補鹽補Gel補水,之後又繼續出發,準備挑戰呢個賽事路線最高嘅山峰--黃嶺。 初段我哋仍間中有講有笑,開始上山後開始一言不發,集中精神依靠住行山杖一步一步向上行,嗰個時候已經無多餘精力去諗其他嘢,只係見路就行,見石級就上,唔知過咗幾耐,終於上到頂,馬上補Gel,之後再繼續行。 經過犁壁山,醫師已經開始叫眼瞓,我哋就叫佢去仙姑峰等我哋。等佢一支箭衝咗去,我哋仍keep住急行。呢段路好似行極都行唔完咁,嗰陣大家都已經攰透,已經連講嘢都唔想講。再唔知行過幾多個山頭,終於到達純陽峰。 上到純陽峰,各人再抖足精神繼續去,雖然離終點仍有一大段路,但心情好似覺得落咗仙姑峰就已經到終點一樣。經過一個又一個峰,一個又一個倒數,去到仙姑峰就見到醫師,一齊喺最後一個check point SCP2登記後,知道無水補給,唯有堅持盡快去到終點,時間3小時21分。 落咗仙姑峰,馬上向南涌出發,本來都想慢jog,但經過其間嘅石路差啲因為之前腳腕扭傷而跌倒,只好依靠行山杖急行,呢段路相信係我呢一生中感覺最長嘅6km。 終於離開連綿不斷嘅山林路,知道只係得返一段大落斜,慢jog已經唔得,只好仍然急步行,去到終點附近,見醫師同Freddy已經喺終點附近,就4子一齊手拖手過終點,時間1小時23分。 到達終點後已經見到前進師兄,佢作為我哋終點嘅support--接送我哋離開南涌。 再一次多謝為我哋作為support嘅Mavis同前進。 分段時間: […]

Share
Continue reading »
1597078_10152305016399497_166841426_o1-150x150.jpg

[雷利練習] 自走終極長課 – 南涌至油塘

由於未夠練習里數,又就唔到隊友時間,決定一個人再走終極長課 – 油塘至南涌,大約64km。由於南涌夜晚交通不便,所以決定逆走衛徑 – 由南涌至油塘。 壞人師兄曾經講過,逆走難度較大,我未真正試過全段逆走,最多只由南涌到太和,只係諗住跑到幾夜都容易走人。 由於路程長,加上希望訓練自己好似比賽咁唔好停低食嘢,以往我只準備5件青瓜卷,今次準備咗多1倍,仲有1L水同500ml水動樂。 朝早7:30已到達粉嶺,喺吉野家食咗個迷你飯早餐就搭小巴到南涌,半個鐘車程加埋行到起點,8:47分開始起步。 開始時係一條長斜路,我就急步上山,進入山路後,上斜上石級就慢行,平路同落斜就慢jog,比起上星期,天氣雖然稍熱,但仍然唔覺辛苦。 行到一個分叉位,一條上一條落,見一隻狗趴咗喺條落山路,睇完路標,原來係上山,心諗隻狗一定話我:「行山初哥,我趴喺度阻住你已經話咗你知要上山喇。」 行到6.5km左右,差唔多去到上仙姑峰嘅樓梯位,突然見到個著住黃色衫嘅師兄迎面跑緊過嚟,正當我諗緊:「吖,呢位師兄好勤力喎,咁早就已經操緊山。」睇清楚原來係壞人師兄,say個hi之後我就開始加速,心諗:「死喇,以佢嘅食力去到南涌返轉頭一定界硬我,但⋯⋯唔好咁快俾佢過頭咁樣衰呀 (~_~;)」,就一口氣走上仙姑峰,時間1小時19分。 上到峰頂就繼續去下一個峰,呢個時候,慢慢感覺到太陽愈來愈猛烈,過咗幾個峰後,已經無力再跑,只係急步不停向前行,亦不時回頭望,好驚壞人已經殺到上嚟。呢個時候水消耗得好快,後來決定先飲水動樂(飲水動樂唔會解渴,如果留到最後飲,之後會更加口乾)。 過咗八仙嶺,之後有一段路太陽被山峰擋住,回過氣又開始慢jog。過咗一陣又重見太陽,而頭先嗰一陣陰涼令我體力回復,加上落斜比較多,可以繼續keep住慢jog。 好景不常,曬曬吓人一熱又開始死狗,繼續急步行,呢個時候水動樂已經飲光,水亦只剩返500ml左右,鐵定唔夠水,原本諗住捱到碗窰再加水,而家要改變計劃去太和補給。曬到暈暈吓,已經無心機再理壞人會唔會追過我,只係繼續慢慢行,以免身體出汗水份大量流失。 捱到落咗黃嶺去到鶴藪水塘,即刻走落溪澗用水淋頭淋身,降溫後,精神啲就馬上食gel同青瓜卷,飲咗200ml水左右又繼續上九龍坑山,同時發覺雙腳有啲酸軟。 上九龍坑山時已經知道自己爆咗偈,唔行樓梯依賴住行山杖一步一步行shortcut上到頂,之後不論上斜落斜或平路都已經無力跑,慢慢keep住行,一感覺口渴催眠自己,學壞人話齋:「幻覺嚟啫,嚇我唔到嘅」。去到涼亭知道快到九龍坑山頂,一鼓作氣繼續向前行。 去到九龍坑山頂,時間2小時53分,奬勵自己飲咗200ml(食鹽丸),希望剩低嘅100ml水夠我落山(兩個水樽每邊得返少少水)。 落樓梯嗰陣時間已經1點鐘,太陽仍然無離開嘅意思,繼續大大力曬住,我繼續忍住,行到第一個標柱,將一個水樽飲完;再過幾個山頭到達最高嘅亭,知道已經不遠,飲埋剩低嘅水之後繼續走,最終成功到達大埔頭村,馬上走到附近公廁用水洗臉淋身,原本想去太和補給,突然睇到旁邊嘅士多,諗都唔諗就坐低叫咗支啤酒飲(後來醫師話解酒時會仲熱,不過當時仲邊度理得咁多喎 σ^_^;)。飲完啤酒,身體涼返,頭腦清楚返,就決定喺呢度食個餐蛋麵補水(竟然用出前一丁麵喎 ^o^)。 之後就係大冒險嘅開始,因為之後一段由石蓮路到碗窰嘅路段我只由隊友帶我行過一次,仲要係順走。好彩出發前搵過Google Maps,都大約知道位置,過完錦和橋,憑記憶好快就搵到石蓮路。 食完嘢休息咗一陣之後,體力已回復大半,就喺跟住嘅路段慢jog。就喺去到上碗窰之前,當我慢jog過一堆枯葉,一條同枯葉一樣顏色、大約4、5尺長嘅蛇突然彈起,我嚇到即刻彈開。去到上碗窰,跟住個「衛奕信徑」路牌入村行咗一陣,毫無頭緒自己繼續搵,雖然唔係原本嗰條路,但都靠住運氣出得返去碗窰路,時間2小時26分(包括半個鐘食飯)。去士多買咗支咸柑桔飲,繼續沿碗窰路行上土墩下。 喺土墩下沿大石陣上到鉛鑛坳,正想喺廁所洗個面就撞到醫師,傾咗一陣就繼續出發,呢個時候天氣慢慢轉涼,同今朝比簡直兩個世界,我就慢慢jog落水塘。正當見到水喉諗住洗個面,就見到壞人同醫師慢jog嚟緊。行咗一陣,壞人開始慢jog,由於我嘅體力喺八仙嶺至九龍坑山已經消耗得七七八八,唯有死跟,去到城門大壩,時間1小時56分。 喺城門水塘再食幾件青瓜卷同食咗包gel,之後繼續出發,慢jog之餘,不斷望前留意壞人點樣使用行山杖,好快我哋就到達大埔道,時間51分。 飲咗水,馬不停蹄又要挑戰6.5km嘅引水道魔咒,壞人同醫師一支箭衝咗去,我擔心跑唔完keep住pacing慢慢跑,最後終於破咒一口氣跑完,但天已經黑齊,馬上戴好頭燈,飲啲水即刻上山追返佢哋,好快又已經到達沙田坳,時間1小時14分。 時間已經7點幾,因為士多快要閂門,除咗飲品連燒賣都無,我飲咗佳得樂同可樂,食埋剩餘嘅幾件青瓜卷,壞人就想馬上上路,因為去到油塘預計已10點。起步後,壞人以比我哋急步行仲快嘅速度上山,同我哋嘅距離愈拉愈遠,我同醫師無晒計,只好急急腳死跟。畢竟我有經常操練這一段路,去到飛鵝山路一段比較平坦路段,就叫醫師慢jog拉近同壞人距離。之後嘅路段,好彩我喺落山下過一番苦功,上山平路我跟唔到,就喺落山拉近返距離,去到井欄樹時間1小時34分。 「剩返9km,頂埋佢!」雖然體力仍有,但呼吸已開始散亂。油塘至沙田坳係我練習得最多嘅路段,之後我竟然成為咗領航員,雖然已經天黑,但記憶仍在,喺關鍵位置,仍可指示出正確路線。最後嘅一段,壞人問我仲可唔可以跑?我答「盡量跟喇」,但實際情況係:我未回到氣,雖然體力仍在。 最後到達油塘,時間1小時12分,醫師喺度等我,壞人已跑去地鐵站計時間。 雖然跟唔到壞人同醫師嘅pacing,但起碼,我完成咗呢個64km終極長課,而且係逆行。 PS. 壞人話最後一段慢jog係最關鍵一段,原因係:「嗰度係墳場」– 我暈了 囧rz […]

Share
Continue reading »
1597078_10152305016399497_166841426_o1-150x150.jpg

[雷利練習] 南涌至太和,再由太和到大尾督

由於未有一次成功到過南涌,所以今次我建議逆走衛徑,走得幾多得幾多,而且後段近市區,跳車位比較多,就算夜亦方便離開。 今日醫師亦叫咗Tommy,我哋喺粉嶺食完早餐,就搭小巴入南涌。落車後,沿鹿頸路行十幾分鐘到達衛徑終點,亦即雷利終點位置。起步行過1、2km上斜,之後就進入古道。因為今日預計係長課,所以唔敢快,只係慢慢jog,要保留足夠體力。 大約1小時後,我哋就到達比較熟識仙姑峰山腳。今次另一個功課,就係要熟習使用行山杖,所以就試用行山杖,起初都唔係好慣,而且無想像中慳力。結果由南涌到達仙姑峰時間為1小時28分。 之後繼續上山落山,走過八仙嶺,慢慢喺不斷上山落山嘅途中知道點樣運用行山杖,到咗鶴藪水塘食咗一包gel,之後繼續走上九龍坑山,到達九龍坑山出頂時間為2小時19分。 之後九龍坑山到大埔頭村,基本都係落山路段,我哋就一窩蜂衝落去,中途撞到發緊燒仍然堅持操練嘅壞人師兄,影張相就繼續衝落去,到達大埔頭村時間為30分左右。 之後大家喺太和大家樂食個午飯,出發前醫師建議回頭走多轉,結果大家就回到大埔頭村再走一次九龍坑山,到達山頂時間係51分。 之後我哋繼續行,由於知道醫師同Tommy跑得比較快,就叫佢哋走先,我哋會慢慢追上嚟。落到鶴藪水塘,我哋就急步走回氣,喺燒烤場會合醫師後繼續走上黃嶺。 上完黃嶺之後我哋繼續向前急步行回氣,一上到純陽峰見到正在日落,咁啱Freddy又踩喺石度休息,我見機不可失,就幫Freddy影咗張好型嘅相,跟住雄哥同我都各自影咗一張,之後繼續前行,無幾耐又撞到正在逆走壞人師兄,今次只係傾咗兩句就繼續,好快終於到達仙姑峰,時間大約3小時。 之後我哋一鼓作氣衝落樓梯,就喺山腳見醫師等緊我哋,商量後由於南涌太夜無車走,只好以大尾督作為終點。四子連同Tommy以高速狂奔,走到一半天已黑齊,大家戴上頭燈衟繼續跑,最後去到大尾督,時間21分。 分段時間: 1. 南涌至仙姑峰: 1小時28分 2. 仙姑峰至九龍坑山頂: 2小時19分 3. 九龍坑山頂至大埔頭村: 30分 4. 太和午餐: 1小時27分 5. 大埔頭村至九龍坑山頂: 51分 6. 九龍坑山頂至仙姑峰: 3小時 7. 仙姑峰至大尾督: 21分   Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 大潭至元墩下

受颱風影響,今日天氣仍然炎熱。 今個星期可能太多高強度訓練(星期二19km練山,星期四新丁班嘅Tempo),星期五晚還作感冒,明顯今日唔在狀態,但因雄哥唔知下星期可唔可以出席練習,唯有見步行步。 今日由大潭出發,我同Freddy雄哥約定喺中環早餐,之後再搭巴士。原本同醫師約好喺網球場等,結果因為落遲咗一個站就先行到起步點。 等到醫師到達,我哋立即出發。 一開始由燒烤場出發後,大家都急步行,呢段最辛苦係紫羅蘭山,不過相對於之後嘅上山路,呢段仍算"輕鬆";而今日天氣雖然熱,但練咗咁耐都已經不覺辛苦,好快就已經返回陽明山莊,時間1小時15分。 跟住就馬上進入二段直上渣甸山。渣甸山仍然唔算好難行,而天氣慢慢開始炎熱,但就喺呢個時候,身體感覺開始出現異樣:身體發滾,完全跑唔郁,就算平路落斜都一樣,好彩雄哥見我有問題就跟我一齊急行,落到山腳仲突然一下暈暈哋,立即諗起可能係血醣低(今朝早餐飲咗齋啡,以前都有試過運動前飲齋啡會出現頭暈,嗰陣會立即走去7仔買朱古力食),馬上食咗包gel再繼續起行,十幾分鐘之後開始慢慢恢復狀態,4子就慢jog到鰂魚涌,時間1小時30分。 喺鰂魚涌補完水,而雄哥亦因為汗水濕透跑鞋而要另外買襪同鞋墊,之後就搭地鐵過海,而呢個時候,醫師因為唔舒服而中途退出。出地鐵後3子繼續前進,到達衛徑3段起步點用去1小時09分。 起步後,天氣加倍酷熱,太陽同星期二我自操衛徑時一樣直曬,我哋上五桂山都唔敢快,直至轉入馬游塘村附近嘅古道,我哋先開始慢jog一陣,一離開古道,馬上又開始急行,最後去到井欄樹,時間1小時23分。 喺井欄樹村食完午飯及補水,進入西貢古道後又開始慢jog,去到大藍湖路,見到太陽仍然猛烈,就知道一陣嘅東洋山會係一場硬仗。3子互相鼓勵,終於完成東洋山,到沙田坳道撞到「背水之戰」嘅參賽者,我哋就慢jog落山,終於到達沙田坳士多,時間1小時52分。 之後又一次出事,因為太口渴,喺沙田坳士多飲咗一罐可樂同佳得樂,食咗兩舊青瓜卷,之後嘅引水道,水份太多令胃好唔舒服,原本希望一口氣跑出去嘅願望落空,喺剩返4km嘅亭停低休息。行咗1km回氣後,就忍住辛苦一口氣衝出引水道,時間1小時15分。 3子行到衛徑6段入口位,雄哥見我塊面紅得厲害,就叫我多休息一陣,我立即用水降溫,休息咗幾分鐘,就開始上山進入衛徑6段。 入6段後,狀態開始慢慢回復,之前一直嘅唔舒服現象完全離我而去,就開始跟返隊友pacing慢jog,去到城門水塘時間為1小時16分。 因為已經入黑,預計到達元墩下已經8點多,就決定喺元墩下撤退。戴好頭燈,急步走向鉛礦坳,途中遇到路旁一條4尺長嘅金腳帶;而喺落元墩下嘅大石陣又遇到一隻箭豬,最後到達終點,時間1小時46分。 分段時間: 1. 大潭水塘燒烤場至陽明山莊 : 1小時15分 2. 陽明山莊至鰂魚涌 : 1小時30分 3. 鰂魚涌補給及搭地鐵過海,之後步行到衛徑3段 : 1小時09分 4. 油塘至井欄樹 : 1小時23分 5. 井欄樹午飯 : 34分 6. […]

Share
Continue reading »
1597078_10152305016399497_166841426_o1-150x150.jpg

[雷利練習] 將軍澳運動場至沙田坳

原本今日想練沙田坳斜路,但長跑網想我上午幫手影將軍澳pb跑video,加上星期日練山嘅里數唔夠,所以決定更改路線。 今日天氣特別熱,拍完pb跑比賽已經10:30am,喺運動場打爆兩個水樽 (約1L)後,行到半路,又買多1支700ml水,就沿翠嶺路一直慢jog,去到調景嶺站對面已經見到華人永遠墳場入口。 呢條路我第一次行,好寬敞,沿途都見到有跑友跑步。 一大段平路,過咗廁所之後就係一大段上斜,上到盡頭就係靈灰閣,因為天氣實在太曬太熱,就走入靈灰閣買咗罐可樂,順便食咗兩舊青瓜卷,之後繼續出發。 因為係練習,我並無喺墳場中間上山插入衛徑3段,而選擇行到衛徑3段起始點,全段大約4.48km,時間37分鐘。 衛徑3-4段係我練得最多,亦都係最熟悉嘅路段,平時上到魔鬼上頂已經可以慢jog,但今日嘅狀態奇差,加上烈日當空,真係跑幾步都覺得辛苦,只好上山平路都急行,落山就可以加快少少速度。最難捱嘅竟然係之後嘅五桂山,要停一停回氣,更要用水淋身降溫。 轉入馬游塘古道,陽光已經唔可以直接照射入嚟,即時舒服咗好多,加快腳步跑落石級。去到馬游塘村,陽光又出現,只好不停喝水慢行、毛巾放後頸、行喺樹蔭底‧‧‧‧‧‧用盡一切方法令自己可以繼續練習(呢個時侯真係感受到樹木嘅珍貴)。 好唔容易先去到井欄樹士多,用咗1小時24分,比上次自己時間慢咗10分鐘。 喺井欄樹士多馬上補水,食埋最後一舊青瓜卷之後走入西貢古道。補水後,狀況比頭先好咗,就喺古道慢jog,落到大藍湖路,陽光仍然猛烈,但已經無之前咁辛苦。 看錶時間已經兩點多,因為夜晚要同屋企人食飯,就決定好好走完這個東洋山,之後在沙田坳撤退。 轉入牛寮後,開始走上東洋山。雖然星期日走完34km,但仍然無乜疲勞嘅跡象,睇嚟腳嘅耐力都仲ok,就按住自己嘅上山速度慢慢上,今日個天都算係幾幫我,喺最困難嘅一段竟然一大舊雲遮住咗太陽。 走到基維爾營,兇猛嘅太陽又走返出嚟,我就慢慢上斜,上到大老山氣象站就開始慢jog落斜,到達士多用咗1小時55分。 分段時間: 1. 將軍澳運動場至衛徑3段起點 (4.48km) : 37分 2. 油塘至井欄樹 : 1小時24分 3. 井欄樹至沙田坳 : 1小時55分   Arvid Poon

Share
Continue reading »