Category Archives: 比賽

10620238_10152870910004497_3102732243824413716_o.jpg

45公里黑夜長征 (麥理浩徑4至8段)

報呢個比賽之時,之前完全無考慮過雷利會令我咁有挫敗感 (唔算好滿意自己當日表現)--又扭傷腳,又作抽筋,又差啲中暑,好彩都叫做順利完成。休息咗幾日,做過推拿,身體恢復得好快,扭傷嘅腳腕都無乜異樣;而隊友雄哥雖然喺完成雷利之後都無乜異樣,但間中仍受傷患影響;而醫師今次係獨行俠報咗個人組。雖然大家口講當日唔知可唔可以出賽,但大家兄弟都心中明白,以大家嘅鬥心,就算出嚟成績唔好,都一定唔會退出比賽。 當日3子約埋喺馬鞍山食完個豐富中午tea,就搭99號巴士入到企嶺下,已經見到好多參賽者一早到達起點。我哋存放好行李,拉完筋就四圍行吓。大約六點,大會已開始宣佈參賽者可以進入起點位置。 我同雄哥隊名「啤Bear雄」,大家都對落斜落樓梯比較有信心,所以預先已經有咗默契:上斜急步行,平路落山就jog,而且因為知道自己狀態應該跟唔到醫師,就叫醫師自己跑去做成績,之後大家再終點集合;時間方面,因為大家都上星期跑完雷利,今次定下目標8個半小時內完成已經有交代。 六點半比賽開始時天已入黑,一起步醫師已跟住一大班人衝咗出去,雄哥就不斷同我講,「唔駛跟,開頭都係一大段上斜路,保留體力,急步行跟返自己pacing」。所以我就跟住雄哥一直急步上山,每行一段,雄哥都會確定我係唔係跟喺佢附近。直到第一個落斜,我同雄哥就開始jog,因為速度快咗,雄哥無再回頭確認我嘅位置,就會間中叫我一聲;而我聽到就會同佢講返我喺佢左/右手邊。 今日感覺腳腕好似無乜事,而且狀態都回復正常。 上到馬鞍山,聽到有人數位置,我哋大約喺70左右,再過一陣,前面已經見唔到人,後面都唔覺有人跟嚟,我哋繼續一路慢jog,去到涼亭,突然覺得「咦?咁快嚟到嘅?」。再過埋茅坪,就喺差唔多去到基維爾營地,突然俾地下嘅樹枝棘親跌倒,跌損咗膝頭,但見無乜事就起身繼續去,去到基維爾營地補給站時間2小時03分。 我哋補咗水,等雄哥頭燈換埋電,我哋又繼續出發,好快已經去到沙田坳道過埋CP1,之後jog落沙田坳士多,嗰陣係9點05分,見到無嘢補給我哋就繼續去。 上完獅子山,就喺落山嘅時候發現自己體力開始下降,就同雄哥講好喺上筆架山前嘅涼亭做補給。捱到涼亭,馬上補Gel補鹽補水,但呢短短唔夠5分鐘,已經俾一行十幾人過咗。補給完繼續上筆架山,由於啱啱補完Gel,仍未有足夠體力,只好依靠行山杖慢慢爬上去,上到山頂,到落山路我哋又開始追上去,到達龍欣道CP2佢哋已經被我哋追上,去到鷹巢山前涼亭,大部份之前超前我哋嘅參賽者已經被我哋追返,而呢個時候我跑得開始有啲辛苦,雄哥就由我帶pacing繼續jog,跑咗一陣開始上返力,去到大埔道時間1小時40分。 之後我哋繼續慢jog,去到金山路已經開始肚餓,我哋一路食嘢一路急步上斜,雄哥就食醫師開賽前俾我哋嘅蛋糕,而我就食雷利攞多咗嘅PowerBar。就喺離開金山路轉去上山路段,我哋又被一名女師姐過頭,而之後嘅落山路段,我哋一直緊貼嗰位師姐直到城門水塘CP3,時間42分。 去到城門水塘,飲咗半樽水動樂,發現原來仲有冰凍可樂,飲住可樂食咗兩件三文治,補好水繼續出發挑戰針草帽。 慢跑去到針山山腳,看看手錶已經用咗6小時5分,睇嚟仍然可以做到8個半小時內完成,就抖足精神上山,不知不覺就已經到達針山頂 (明明上次上山辛苦得要死),正當我哋補水補Gel,嗰位師姐同佢隊友就喺針山頂過我哋,之後喺落樓梯,我哋又緊貼佢哋。最後我哋兩隊幾乎一齊到達山腳,之後兩隊都一直keep住急行上草山,差唔多到頂,我同雄哥加快步伐將佢哋拋離,雖然喺草山山腳因為無標示等咗一陣,之後慢jog又一次再將佢哋拋離,到達鉛礦坳時間1小時38分。 鉛礦坳只得水同唔凍嘅可樂,我同雄哥補完水同Gel,就過CP4開始上大帽山。嗰陣時間已經6小時43分,雄哥就問唔知我哋可唔可以8小時內完成呢?(上次試路大家都心知仲有一大段山路要行,之後有超斜石屎路,仲有6km長落斜路) 於是大家集中精神,一步一步不停上,上到大石陣,亦唔知道雄哥點樣搵到條路,總之就跟住佢跨石而上,上到頂之後開始有啲平路,呢個時候開始有啲霧水,雄哥再鼓勵我「我哋仲有機會8小時內,如果得嘅我哋就慢jog,少少都好,一啲啲時間去追」,其實今日狀態比雷利嗰日好得多,體力仍然有貨,只係上山之後要啲時間回氣。所以見雄哥開始jog,我就跟住jog,佢跨石我又跟住去。 感覺好似唔係過咗好耐,突然感覺呢度好似就係開始落山路段,就問雄哥,雄哥啱啱答完「未到,都仲未見到個白波」,跟住佢突然認得係呢度開始落山,我哋精神一振,就係咁衝落去石屎路。 飲咗啲水,我哋繼續急步行上大斜路。呢段路雖然斜,但都可以同雄哥繼續講笑,感覺好似只係轉咗幾個彎就已經見到燈光,我哋已經上到大帽山頂。睇睇時間,7小時15分,雄哥話佢上年成績七小時五十幾分,仲有6km大落斜,我興奮問係咪有機會pb?雖然佢話未到終點都未知,但我哋仍然希望成功,無再休息,依靠行山杖減輕膝頭嘅壓力,慢慢地跑落去。 數住一個個嘅彎位,心情就愈來愈興奮,終於見到燈光,我哋加快腳步,最後以7小時38分,團隊第七名衝過終點。               分段時間: 1. 水浪窩至基維爾營地 : 2小時03分 2. 基維爾營地至大埔道 : 1小時40分 3. […]

Share
Continue reading »
result.jpg

雷利衛徑78km全征

經過幾個月嘅山路練習,今日終於完成咗「雷利衛徑78km全征」,完成時間17小時13分,總排名23/298,組別排名11/185,盡晒力起碼對自己都有個交代。 10月11號當日六點幾同雄哥食個早餐,就搭的士到達大潭水塘燒烤場-「雷利衛徑78km全征」比賽嘅起步點。嗰陣七點幾,天氣仍然清涼,四子集合後就去領取號碼布,點名時我由於會錯意(以為每隊要準備1個哨子),結果我要向會場counter買哨子。 總算順利完成登記,寄存好行李,稍作休息已聽到大會宣佈比賽快將開始,我哋馬上到達起跑地點,倒數後比賽正式開始。 一開始已見到大量參賽者一窩蜂跑咗出去,四子就按住大家比較舒服嘅步速,沿住大潭水塘道路慢jog。及後開始上紫羅蘭山,已慢慢開始覺得天氣炎熱,還好間中有山風吹過,仍然唔覺得辛苦,最後跑回陽明山莊,時間1小時。 喺陽明山莊CP1登記後,食咗一隻香蕉及補水,馬上走上衛徑二段渣甸山。可能食完早餐無耐,又或剛才飲水太多,上山已開始頂胃,上到山頂後肚脹感覺先慢慢消失。呢個時候,有隊白衫、著晒Salamon裝備嘅外國人不停同我哋爭持,上山明顯佢哋有較好嘅體力,但落山我哋又有時會過頭,呢個時候呼吸開始覺得辛苦,仲以為自己體能差咗,直到Freddy提醒速度過快,我哋先慢落嚟,最後去到鰂魚涌時間為1小時4分。 去7仔買咗支水動樂,就jog去鰂魚涌站搭地鐵,一到油塘又開始jog出去,去到炮台山SCP1,問工作人員邊個check point仲會有補給,佢話要去到井欄樹,咁我哋只好繼續前行,到達衛徑3段開始點時間28分。 開始入衛徑3段,仲未回到氣,開始嗰段都係急行,行咗幾分鐘之後先開始慢jog,落到澳景路見到有補給,一邊唸唸碎點解連工作人員都唔知補給站喺邊,一邊就食麵包同補水,呢個時候陸續有其他參賽者出現,出發前問工作人員下個補給站,佢哋話係沙田坳,之後我哋沿樓梯上到CP2登記。 登記完繼續出發,由於太陽曬住,天氣愈來愈熱,行起嚟都覺辛苦,好彩仍有山風,加上之前練過烈陽,仍然仲頂得住。 好快差唔多到達井欄樹,前一晚跑友SamSam會下晝1點喺井欄樹做義工,問過我哋要乜嘢補給,醫師答過話要水動樂,但我哋比預期早到,到達井欄樹時間1小時17分。 由於之前CP2嘅義工話要到沙田坳先有補給,加上天氣熱,回覆完SamSam我哋已到達井欄樹,就到附近士多飲汽水。出發後,轉個彎就見到CP3有補給,四子又一輪炒蝦拆蟹後,攞咗Gel、2包PowerBar同電解飲品,補完水就進入西貢古道。 就喺西貢古道其中一段,由於行山杖被樹藤勾咗一下,左腳腳腕扭咗一扭,平衡好身體跑咗兩步,覺得腳腕只係有少少唔舒服,又唔覺得痛,無理到就跟住隊友到達大藍湖路。 食完嗰包大會提供、好重藥水味、好難食嘅Gel後,繼續步行開始走上東洋山,惡夢先正式開始。開頭一段由於仍有樹蔭,雖然上得辛苦,仍然稱得上叫做舒服;點知一離開樹蔭,太陽直曬頭頂,只好死忍,一步步用行山杖慢慢爬上去,行一段就馬上補水,沿途雄哥仍不斷鼓勵我哋。幾經辛苦終於到頂,行到基維爾營門口,發覺我條壓力短褲同小腿套已黐滿晒鹽粒。 喺沙田坳道落斜,Freddy開始抽筋,我哋就停低等醫師幫Freddy按摩大腿,而我嘅4頭肌都作抽筋,即刻噴咗啲噴劑,再不斷彈跳去鬆弛肌肉,好返啲我哋又再出發,落到沙田坳士多時間為2小時2分。 我哋馬上喺CP4登記後就馬上補水,我就攞咗個雪梨補水,之後入士多每人補咗支電解飲品,兩碟飯四個人分,之後又繼續出發。落到引水道,我又中魔咒,跑咗一陣,已經好唔舒服,雄哥見到,就一齊先行500m等我回氣,之後繼續慢jog。慢jog咗一陣,辛苦感覺又返番嚟,唯有死頂,旁邊雄哥不斷鼓勵,我就死頂keep住一口氣繼續跑,好唔容易頂晒成條引水道去到大埔道,時間1小時15分。 之後四人一路慢行到城門水塘等我回氣,去到上城門水塘附近到達CP5,醫師見我成塊面紅晒,就攞水幫我淋身降溫,補完水又繼續出發。降溫後,身體狀況明顯好轉,但由於抽筋感覺仍然隱約存在,唔敢跑得太快,繼續行一段jog一段,到達城門水塘時間為1小時27分。 喺城門水塘CP6登記後,攞住大會派發嘅膠杯要咗一杯熱朱古力,食咗一塊麵包,等雞蓉粟米湯煲好,亦要咗一杯(直頭係未熟好嘅罐頭湯),呢個時候腳瓜瓤已經被臏骨帶磨損晒,就走去醫療站攞膠布,之後繼續出發。 沿城門林道一路急步行,正奇怪行咗咁耐都未遇到一個雷利156嘅參賽者,過咗一陣就開始陸陸續續見到,到咗鉛礦坳去個廁所,就馬上進入大石陣。開頭仍以平時落山方式,一下腳腕突如其來嘅疼痛令我忽然脫力,多得行山杖不致令我跌倒,但已經唔敢再快。 又行咗一陣,發覺用腳踭落地腳腕會無咁痛,又開始加快步速,去到平路同樓梯就更加跑落去,去到元墩下時間1小時32分。 行前啲去CP7登記後,撞到大圍師兄回程,飲咗杯熱朱古力後繼續出發,呢個時候天開始入黑,我哋就停喺小巴站戴上頭燈繼續前行。Mavis係我哋另一位喺太和嘅support,由於已過咗約定時間,到尾段醫師就先跑去會合Mavis,我哋就繼續keep住急行,其間見住好多跑友喺落斜快步過咗我哋,但我哋都keep住速度行,留力準備挑戰最後兩座最甘嘅山峰。 見住好多跑友過我哋頭嘅同時,亦見到好多有用行山杖嘅師兄,記得壞人師兄上次講過我運用到行山杖嘅30%都無,所以就趁佢哋過我哋,我就留意佢哋點用行山杖,好似又有一啲領悟。 去到錦和橋,見到好多參賽者休息補給,喺橋尾見到Mavis已經喺度,我哋食咗佢為我哋帶嚟嘅手卷同寶礦力,稍作休息,合照後繼續出發。 去到大埔頭村,見到大量參賽者喺度補給休息,入廁所洗個面,抖足精神,出發挑戰九龍坑山。當時其實心情好複雜--行咗咁長途,腳已經攰到不能,上完九龍坑山之後,仲有個黃嶺同八仙嶺;但另一種諗法,已經去到九龍坑山,就嚟行完喇~ 當然,為咗要完成,就強迫自己去向好嘅方向諗,一步一步,咬緊牙關頂落去,行到一半,發覺頭燈慢慢暗落嚟(起點檢查頭燈時開過,之後唔記得lock返,燈唔知已經開咗幾耐),醫師見狀,同我交換咗兩粒電池,之後繼續頂住去到九龍坑山頂,時間為2小時23分。 依靠住行山杖,有時jog有時行,好快就到咗鶴藪水塘,喺CP8登記後,趕快食咗一片三文治、一杯熱朱古力,坐咗一陣,補鹽補Gel補水,之後又繼續出發,準備挑戰呢個賽事路線最高嘅山峰--黃嶺。 初段我哋仍間中有講有笑,開始上山後開始一言不發,集中精神依靠住行山杖一步一步向上行,嗰個時候已經無多餘精力去諗其他嘢,只係見路就行,見石級就上,唔知過咗幾耐,終於上到頂,馬上補Gel,之後再繼續行。 經過犁壁山,醫師已經開始叫眼瞓,我哋就叫佢去仙姑峰等我哋。等佢一支箭衝咗去,我哋仍keep住急行。呢段路好似行極都行唔完咁,嗰陣大家都已經攰透,已經連講嘢都唔想講。再唔知行過幾多個山頭,終於到達純陽峰。 上到純陽峰,各人再抖足精神繼續去,雖然離終點仍有一大段路,但心情好似覺得落咗仙姑峰就已經到終點一樣。經過一個又一個峰,一個又一個倒數,去到仙姑峰就見到醫師,一齊喺最後一個check point SCP2登記後,知道無水補給,唯有堅持盡快去到終點,時間3小時21分。 落咗仙姑峰,馬上向南涌出發,本來都想慢jog,但經過其間嘅石路差啲因為之前腳腕扭傷而跌倒,只好依靠行山杖急行,呢段路相信係我呢一生中感覺最長嘅6km。 終於離開連綿不斷嘅山林路,知道只係得返一段大落斜,慢jog已經唔得,只好仍然急步行,去到終點附近,見醫師同Freddy已經喺終點附近,就4子一齊手拖手過終點,時間1小時23分。 到達終點後已經見到前進師兄,佢作為我哋終點嘅support--接送我哋離開南涌。 再一次多謝為我哋作為support嘅Mavis同前進。 分段時間: […]

Share
Continue reading »
1597078_10152305016399497_166841426_o1-150x150.jpg

[45K黑夜長征] 試跑麥徑4-8段

同雄哥醫師一齊參加咗「45K黑夜長征」,時間係雷利之後嘅星期六。其實跑完上星期六嘅終極長課之後應該休腳,但麥徑我甚少行,最遠只去到城門水塘,所以就想盡快約埋走一次,就諗住重陽假期大家都放假,可惜醫師要睇證未能出席。 諗住星期六走完長課,雖然星期一同朋友行麥徑2段,都只係郊遊mode,體力上感覺應該可以順利完成。 同雄哥飲完茶,喺馬鞍山坐99巴士入到水浪窩營地,09:30出發。開始無耐,就要沿石級走上600M嘅馬鞍山,之後仲要繼續上上落落,加上太陽曝曬,而且一滴山風都無,體力被消耗得厲害,後段已開始有死死哋跡象,雖然上山平路仍然急走,但落山仍然可以跑住去,終於走完好似無窮無盡嘅路段落到沙田坳道,本想用山水淋身降溫,但睇到原本有水流出嘅幾個位置己經乾涸,唯有慢jog落山希望盡快去到士多補給,最後到達時間為3小時25分。 用半個鐘食個飯同補水就繼續上獅子山同筆架山,食完嘢總覺得腳步沉重,加上補給後,水放得唔好,好難跑得郁。經過兩、三次不停擺位,終於放穩咗,就開始慢jog,呢段由於有樹阻擋太陽,走得比較先前舒服,到達大埔道時間為1小時29分。 之後無休息繼續慢jog到金門路,就沿金門路行上去,之後仍然用「上斜行,落斜平路慢jog」,慢慢開始感覺到原來身體似乎仍然未休息夠,到達城門水塘燒烤場時間為47分。 燒烤場擠滿咗燒烤嘅人群,汽水售賣機沽清,路旁賣水嘅伯伯被人群圍得團團轉,我哋最後決定唔買嘢飲,稍稍用水洗面降溫後,就慢jog過大壩準備上針山。 呢個時候天開始落大雨。原來今日係「針山十登」比賽,去到針山腳見到跑友成成做緊義工,say個hi就繼續上路,一路上不斷有比賽緊嘅師兄跑落山,我哋就慢慢繼續上,去到一半,又見到另一跑友夢離。去到針山頂見到兩位義工師兄,傾咗一陣順便休息一下,師兄就問我哋夠唔夠水,因為比賽己經完結,可以把剩餘嘅水都俾我哋,我哋將水樽入滿就繼續出發。 落完針山,己經見到其他義工收拾物品離開,我哋仍沿住石屎路繼續行,行到草山腳,雄哥問我上唔上草山(因為我帶漏咗頭燈),如果上草山,就唔能夠入黑前去到大帽山。結果我哋跳過草山段直jog去鉛鑛坳,時間1小時35分。 喺鉛鑛坳休息咗大約5分鐘,食咗包gel,趁未天黑就一鼓作氣去埋大帽山。半路遇到一位正喺大帽山跑緊落嚟嘅師兄,話之前大帽山落好大雨,我哋之為只好似城門水塘差唔多,點知一上到山,全部路面都係水氹,石頭都變得濕滑,好彩多得行山杖嘅幫助,好幾次踩喺石面上差啲冼低前都可以平衡到身體。慢慢行完呢段泥濘路,見到石屎路諗住有好日子過,點知原來先係惡夢嘅開始。 好彩有行山杖嘅幫助,但要行上呢段好似行極都行唔完嘅大斜路,真係無咗半條命,一路不停上不停轉彎,十分消耗人嘅意志。終於去到個「白波波」,停低休息一陣,馬上又開始落斜,我同雄哥行咗一小段俾我調節呼吸,又開始慢jog落去。呢3K落斜同頭先一樣,都係落極都好似落唔完。好彩前兩日趁住休息睇咗好多學習資料,就慢慢去試慢慢印證,雖然慢咗啲啲,但膝頭真係無咁受力,而且跑咗一陣,呼吸己經回復暢順。 感覺跑咗好耐好耐,終於見到燈光,一個大閘出現喺我眼前,直覺以為到咗家鄉,差啲叫咗出嚟,雄哥話原來未到,仲有1K多,我忍耐繼續跑落去,頭先一大段落山路令肌肉勞累,就改變跑姿改變落地位嘗試令腳嘅其他部份受力,跑到一半天己黑齊,我哋就沿住馬路仍嘅白線走,終於到達終點荃錦坳扶輪公園,時間2小時01分。 分段時間: 1. 水浪窩營地至沙田坳: 3小時25分 2. 沙田坳午餐: 30分 3. 沙田坳至大埔道: 1小時29分 4. 大埔道至城門水塘: 47分 5. 城門水塘至鉛鑛坳: 1小時35分 6. 鉛鑛坳至荃錦坳扶輪公園: 2小時01分 Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 自走終極長課 – 南涌至油塘

由於未夠練習里數,又就唔到隊友時間,決定一個人再走終極長課 – 油塘至南涌,大約64km。由於南涌夜晚交通不便,所以決定逆走衛徑 – 由南涌至油塘。 壞人師兄曾經講過,逆走難度較大,我未真正試過全段逆走,最多只由南涌到太和,只係諗住跑到幾夜都容易走人。 由於路程長,加上希望訓練自己好似比賽咁唔好停低食嘢,以往我只準備5件青瓜卷,今次準備咗多1倍,仲有1L水同500ml水動樂。 朝早7:30已到達粉嶺,喺吉野家食咗個迷你飯早餐就搭小巴到南涌,半個鐘車程加埋行到起點,8:47分開始起步。 開始時係一條長斜路,我就急步上山,進入山路後,上斜上石級就慢行,平路同落斜就慢jog,比起上星期,天氣雖然稍熱,但仍然唔覺辛苦。 行到一個分叉位,一條上一條落,見一隻狗趴咗喺條落山路,睇完路標,原來係上山,心諗隻狗一定話我:「行山初哥,我趴喺度阻住你已經話咗你知要上山喇。」 行到6.5km左右,差唔多去到上仙姑峰嘅樓梯位,突然見到個著住黃色衫嘅師兄迎面跑緊過嚟,正當我諗緊:「吖,呢位師兄好勤力喎,咁早就已經操緊山。」睇清楚原來係壞人師兄,say個hi之後我就開始加速,心諗:「死喇,以佢嘅食力去到南涌返轉頭一定界硬我,但⋯⋯唔好咁快俾佢過頭咁樣衰呀 (~_~;)」,就一口氣走上仙姑峰,時間1小時19分。 上到峰頂就繼續去下一個峰,呢個時候,慢慢感覺到太陽愈來愈猛烈,過咗幾個峰後,已經無力再跑,只係急步不停向前行,亦不時回頭望,好驚壞人已經殺到上嚟。呢個時候水消耗得好快,後來決定先飲水動樂(飲水動樂唔會解渴,如果留到最後飲,之後會更加口乾)。 過咗八仙嶺,之後有一段路太陽被山峰擋住,回過氣又開始慢jog。過咗一陣又重見太陽,而頭先嗰一陣陰涼令我體力回復,加上落斜比較多,可以繼續keep住慢jog。 好景不常,曬曬吓人一熱又開始死狗,繼續急步行,呢個時候水動樂已經飲光,水亦只剩返500ml左右,鐵定唔夠水,原本諗住捱到碗窰再加水,而家要改變計劃去太和補給。曬到暈暈吓,已經無心機再理壞人會唔會追過我,只係繼續慢慢行,以免身體出汗水份大量流失。 捱到落咗黃嶺去到鶴藪水塘,即刻走落溪澗用水淋頭淋身,降溫後,精神啲就馬上食gel同青瓜卷,飲咗200ml水左右又繼續上九龍坑山,同時發覺雙腳有啲酸軟。 上九龍坑山時已經知道自己爆咗偈,唔行樓梯依賴住行山杖一步一步行shortcut上到頂,之後不論上斜落斜或平路都已經無力跑,慢慢keep住行,一感覺口渴催眠自己,學壞人話齋:「幻覺嚟啫,嚇我唔到嘅」。去到涼亭知道快到九龍坑山頂,一鼓作氣繼續向前行。 去到九龍坑山頂,時間2小時53分,奬勵自己飲咗200ml(食鹽丸),希望剩低嘅100ml水夠我落山(兩個水樽每邊得返少少水)。 落樓梯嗰陣時間已經1點鐘,太陽仍然無離開嘅意思,繼續大大力曬住,我繼續忍住,行到第一個標柱,將一個水樽飲完;再過幾個山頭到達最高嘅亭,知道已經不遠,飲埋剩低嘅水之後繼續走,最終成功到達大埔頭村,馬上走到附近公廁用水洗臉淋身,原本想去太和補給,突然睇到旁邊嘅士多,諗都唔諗就坐低叫咗支啤酒飲(後來醫師話解酒時會仲熱,不過當時仲邊度理得咁多喎 σ^_^;)。飲完啤酒,身體涼返,頭腦清楚返,就決定喺呢度食個餐蛋麵補水(竟然用出前一丁麵喎 ^o^)。 之後就係大冒險嘅開始,因為之後一段由石蓮路到碗窰嘅路段我只由隊友帶我行過一次,仲要係順走。好彩出發前搵過Google Maps,都大約知道位置,過完錦和橋,憑記憶好快就搵到石蓮路。 食完嘢休息咗一陣之後,體力已回復大半,就喺跟住嘅路段慢jog。就喺去到上碗窰之前,當我慢jog過一堆枯葉,一條同枯葉一樣顏色、大約4、5尺長嘅蛇突然彈起,我嚇到即刻彈開。去到上碗窰,跟住個「衛奕信徑」路牌入村行咗一陣,毫無頭緒自己繼續搵,雖然唔係原本嗰條路,但都靠住運氣出得返去碗窰路,時間2小時26分(包括半個鐘食飯)。去士多買咗支咸柑桔飲,繼續沿碗窰路行上土墩下。 喺土墩下沿大石陣上到鉛鑛坳,正想喺廁所洗個面就撞到醫師,傾咗一陣就繼續出發,呢個時候天氣慢慢轉涼,同今朝比簡直兩個世界,我就慢慢jog落水塘。正當見到水喉諗住洗個面,就見到壞人同醫師慢jog嚟緊。行咗一陣,壞人開始慢jog,由於我嘅體力喺八仙嶺至九龍坑山已經消耗得七七八八,唯有死跟,去到城門大壩,時間1小時56分。 喺城門水塘再食幾件青瓜卷同食咗包gel,之後繼續出發,慢jog之餘,不斷望前留意壞人點樣使用行山杖,好快我哋就到達大埔道,時間51分。 飲咗水,馬不停蹄又要挑戰6.5km嘅引水道魔咒,壞人同醫師一支箭衝咗去,我擔心跑唔完keep住pacing慢慢跑,最後終於破咒一口氣跑完,但天已經黑齊,馬上戴好頭燈,飲啲水即刻上山追返佢哋,好快又已經到達沙田坳,時間1小時14分。 時間已經7點幾,因為士多快要閂門,除咗飲品連燒賣都無,我飲咗佳得樂同可樂,食埋剩餘嘅幾件青瓜卷,壞人就想馬上上路,因為去到油塘預計已10點。起步後,壞人以比我哋急步行仲快嘅速度上山,同我哋嘅距離愈拉愈遠,我同醫師無晒計,只好急急腳死跟。畢竟我有經常操練這一段路,去到飛鵝山路一段比較平坦路段,就叫醫師慢jog拉近同壞人距離。之後嘅路段,好彩我喺落山下過一番苦功,上山平路我跟唔到,就喺落山拉近返距離,去到井欄樹時間1小時34分。 「剩返9km,頂埋佢!」雖然體力仍有,但呼吸已開始散亂。油塘至沙田坳係我練習得最多嘅路段,之後我竟然成為咗領航員,雖然已經天黑,但記憶仍在,喺關鍵位置,仍可指示出正確路線。最後嘅一段,壞人問我仲可唔可以跑?我答「盡量跟喇」,但實際情況係:我未回到氣,雖然體力仍在。 最後到達油塘,時間1小時12分,醫師喺度等我,壞人已跑去地鐵站計時間。 雖然跟唔到壞人同醫師嘅pacing,但起碼,我完成咗呢個64km終極長課,而且係逆行。 PS. 壞人話最後一段慢jog係最關鍵一段,原因係:「嗰度係墳場」– 我暈了 囧rz […]

Share
Continue reading »
1597078_10152305016399497_166841426_o1-150x150.jpg

[雷利練習] 南涌至太和,再由太和到大尾督

由於未有一次成功到過南涌,所以今次我建議逆走衛徑,走得幾多得幾多,而且後段近市區,跳車位比較多,就算夜亦方便離開。 今日醫師亦叫咗Tommy,我哋喺粉嶺食完早餐,就搭小巴入南涌。落車後,沿鹿頸路行十幾分鐘到達衛徑終點,亦即雷利終點位置。起步行過1、2km上斜,之後就進入古道。因為今日預計係長課,所以唔敢快,只係慢慢jog,要保留足夠體力。 大約1小時後,我哋就到達比較熟識仙姑峰山腳。今次另一個功課,就係要熟習使用行山杖,所以就試用行山杖,起初都唔係好慣,而且無想像中慳力。結果由南涌到達仙姑峰時間為1小時28分。 之後繼續上山落山,走過八仙嶺,慢慢喺不斷上山落山嘅途中知道點樣運用行山杖,到咗鶴藪水塘食咗一包gel,之後繼續走上九龍坑山,到達九龍坑山出頂時間為2小時19分。 之後九龍坑山到大埔頭村,基本都係落山路段,我哋就一窩蜂衝落去,中途撞到發緊燒仍然堅持操練嘅壞人師兄,影張相就繼續衝落去,到達大埔頭村時間為30分左右。 之後大家喺太和大家樂食個午飯,出發前醫師建議回頭走多轉,結果大家就回到大埔頭村再走一次九龍坑山,到達山頂時間係51分。 之後我哋繼續行,由於知道醫師同Tommy跑得比較快,就叫佢哋走先,我哋會慢慢追上嚟。落到鶴藪水塘,我哋就急步走回氣,喺燒烤場會合醫師後繼續走上黃嶺。 上完黃嶺之後我哋繼續向前急步行回氣,一上到純陽峰見到正在日落,咁啱Freddy又踩喺石度休息,我見機不可失,就幫Freddy影咗張好型嘅相,跟住雄哥同我都各自影咗一張,之後繼續前行,無幾耐又撞到正在逆走壞人師兄,今次只係傾咗兩句就繼續,好快終於到達仙姑峰,時間大約3小時。 之後我哋一鼓作氣衝落樓梯,就喺山腳見醫師等緊我哋,商量後由於南涌太夜無車走,只好以大尾督作為終點。四子連同Tommy以高速狂奔,走到一半天已黑齊,大家戴上頭燈衟繼續跑,最後去到大尾督,時間21分。 分段時間: 1. 南涌至仙姑峰: 1小時28分 2. 仙姑峰至九龍坑山頂: 2小時19分 3. 九龍坑山頂至大埔頭村: 30分 4. 太和午餐: 1小時27分 5. 大埔頭村至九龍坑山頂: 51分 6. 九龍坑山頂至仙姑峰: 3小時 7. 仙姑峰至大尾督: 21分   Arvid Poon

Share
Continue reading »