花名
由讀書到宜家，我擁有好多名稱：讀書時期嘅朋友仔會叫我「聲仔」；到出嚟做嘢，公司同事就會叫我的英文名”Arvid”，有部份亦會叫我「阿潘」；曾經玩過Yahoo! Blog，諗唔到叫乜好就改咗自己做「豆豆伯父」（我細佬個女叫豆豆）；報讀蘇文郁老師嘅商業攝影課程，老師又幫我改咗花名做「啤啤」．．．
接觸電腦
由1983年擁有第一部Apple II+開始，就同電腦結下不解之緣。 起初只係玩吓遊戲，整整吓就開始學寫Program。
到1989年就買咗第一部IBM PC – 80286，嗰陣得30MB hard disk，2MB RAM :p。
1990年就北上去廣州暨南大學讀Computer Science，其間參加過聯校嘅軟件設計比賽，同朋友合作拿到冠軍。
1994年大學畢業就到製衣廠工作咗一年，之後轉到某高級會所工作。喺呢五年嘅工作入面，我了解咗整個POS (Point-Of-Sales) 嘅運作，同時，亦都學到咗好多關於Management嘅嘢（就係因為我唔怕俾人鬧 :p）。
2000年入咗一間ISP (Internet Service Provider) 工作，了解咗整個 Internet 有關嘅運作，學習咗由網內系統轉成互聯網嘅程序設計。
接觸攝影
2005年轉咗入一間動物福利機構，其實當時所學到嘅電腦技術已經唔多，幸好我喺2006年買咗第一部相機之後，到2007年選擇咗報讀蘇文郁老師嘅「數碼商業攝影文憑課程」，擴闊咗自己嘅眼界，亦都認識咗一班真真正正熱愛攝影嘅同學仔。
畢業後入咗「蘇文郁攝影同學會」，以老師提倡啲方針堅持去各個老人中心或社區中心做義工服務，真真正正感受到攝影除咗可以為我哋自己帶來樂趣，仲可以幫助老年人及社會上一啲低收入家庭帶來歡樂。
到今日，喺我慢慢覺得自己攝影技術開始有進步嘅同時，當然要多謝我嘅攝影老師蘇文郁老師，除此之外，我都要多謝一直有俾機會我去大小場合影相嘅朋友仔Winita，教咗我好多攝影知識嘅Ronald，同埋同學會入面將佢哋所學所知嘅攝影知識無私分享嘅各位同學仔。
欣賞本地樂隊
我亦都鍾意音樂，近幾年開始接觸Indie嘅band sound，所認識一班睇show嘅朋友仔，個個都有音樂根底，佢哋一聽就可以知道個setting有乜問題，表演時邊個地方出錯；而我，只係純粹地鍾意聽，鍾意感受每一隊band表演時所帶嚟嘅力量，鍾意去了解佢哋為咗去堅持、去執著自己所認同、所喜歡嘅音樂所帶嚟嘅各種辛酸血淚史，我諗呢一種精神先至叫做 “ROCK” 。但時下青年就一廂情願地以為將自己打扮到古靈精怪，周街爆粗，一味只係識得喺度大聲嗌，再唔係就唱唱吓掉爛個結他呢啲先叫做Rock，好可惜。
如果我哋做每件事都可以堅持執著到最後一分一秒，我諗，我哋每個人都可以好”ROCK” ！！！