[雷利練習] 自走終極長課 – 南涌至油塘

由於未夠練習里數,又就唔到隊友時間,決定一個人再走終極長課 – 油塘至南涌,大約64km。由於南涌夜晚交通不便,所以決定逆走衛徑 – 由南涌至油塘。

壞人師兄曾經講過,逆走難度較大,我未真正試過全段逆走,最多只由南涌到太和,只係諗住跑到幾夜都容易走人。

由於路程長,加上希望訓練自己好似比賽咁唔好停低食嘢,以往我只準備5件青瓜卷,今次準備咗多1倍,仲有1L水同500ml水動樂。

朝早7:30已到達粉嶺,喺吉野家食咗個迷你飯早餐就搭小巴到南涌,半個鐘車程加埋行到起點,8:47分開始起步。

開始時係一條長斜路,我就急步上山,進入山路後,上斜上石級就慢行,平路同落斜就慢jog,比起上星期,天氣雖然稍熱,但仍然唔覺辛苦。

行到一個分叉位,一條上一條落,見一隻狗趴咗喺條落山路,睇完路標,原來係上山,心諗隻狗一定話我:「行山初哥,我趴喺度阻住你已經話咗你知要上山喇。」

行到6.5km左右,差唔多去到上仙姑峰嘅樓梯位,突然見到個著住黃色衫嘅師兄迎面跑緊過嚟,正當我諗緊:「吖,呢位師兄好勤力喎,咁早就已經操緊山。」睇清楚原來係壞人師兄,say個hi之後我就開始加速,心諗:「死喇,以佢嘅食力去到南涌返轉頭一定界硬我,但⋯⋯唔好咁快俾佢過頭咁樣衰呀 (~_~;)」,就一口氣走上仙姑峰,時間1小時19分。

上到峰頂就繼續去下一個峰,呢個時候,慢慢感覺到太陽愈來愈猛烈,過咗幾個峰後,已經無力再跑,只係急步不停向前行,亦不時回頭望,好驚壞人已經殺到上嚟。呢個時候水消耗得好快,後來決定先飲水動樂(飲水動樂唔會解渴,如果留到最後飲,之後會更加口乾)。

過咗八仙嶺,之後有一段路太陽被山峰擋住,回過氣又開始慢jog。過咗一陣又重見太陽,而頭先嗰一陣陰涼令我體力回復,加上落斜比較多,可以繼續keep住慢jog。

好景不常,曬曬吓人一熱又開始死狗,繼續急步行,呢個時候水動樂已經飲光,水亦只剩返500ml左右,鐵定唔夠水,原本諗住捱到碗窰再加水,而家要改變計劃去太和補給。曬到暈暈吓,已經無心機再理壞人會唔會追過我,只係繼續慢慢行,以免身體出汗水份大量流失。

捱到落咗黃嶺去到鶴藪水塘,即刻走落溪澗用水淋頭淋身,降溫後,精神啲就馬上食gel同青瓜卷,飲咗200ml水左右又繼續上九龍坑山,同時發覺雙腳有啲酸軟。

上九龍坑山時已經知道自己爆咗偈,唔行樓梯依賴住行山杖一步一步行shortcut上到頂,之後不論上斜落斜或平路都已經無力跑,慢慢keep住行,一感覺口渴催眠自己,學壞人話齋:「幻覺嚟啫,嚇我唔到嘅」。去到涼亭知道快到九龍坑山頂,一鼓作氣繼續向前行。

去到九龍坑山頂,時間2小時53分,奬勵自己飲咗200ml(食鹽丸),希望剩低嘅100ml水夠我落山(兩個水樽每邊得返少少水)。

落樓梯嗰陣時間已經1點鐘,太陽仍然無離開嘅意思,繼續大大力曬住,我繼續忍住,行到第一個標柱,將一個水樽飲完;再過幾個山頭到達最高嘅亭,知道已經不遠,飲埋剩低嘅水之後繼續走,最終成功到達大埔頭村,馬上走到附近公廁用水洗臉淋身,原本想去太和補給,突然睇到旁邊嘅士多,諗都唔諗就坐低叫咗支啤酒飲(後來醫師話解酒時會仲熱,不過當時仲邊度理得咁多喎 σ^_^;)。飲完啤酒,身體涼返,頭腦清楚返,就決定喺呢度食個餐蛋麵補水(竟然用出前一丁麵喎 ^o^)。

之後就係大冒險嘅開始,因為之後一段由石蓮路到碗窰嘅路段我只由隊友帶我行過一次,仲要係順走。好彩出發前搵過Google Maps,都大約知道位置,過完錦和橋,憑記憶好快就搵到石蓮路。

食完嘢休息咗一陣之後,體力已回復大半,就喺跟住嘅路段慢jog。就喺去到上碗窰之前,當我慢jog過一堆枯葉,一條同枯葉一樣顏色、大約4、5尺長嘅蛇突然彈起,我嚇到即刻彈開。去到上碗窰,跟住個「衛奕信徑」路牌入村行咗一陣,毫無頭緒自己繼續搵,雖然唔係原本嗰條路,但都靠住運氣出得返去碗窰路,時間2小時26分(包括半個鐘食飯)。去士多買咗支咸柑桔飲,繼續沿碗窰路行上土墩下。

喺土墩下沿大石陣上到鉛鑛坳,正想喺廁所洗個面就撞到醫師,傾咗一陣就繼續出發,呢個時候天氣慢慢轉涼,同今朝比簡直兩個世界,我就慢慢jog落水塘。正當見到水喉諗住洗個面,就見到壞人同醫師慢jog嚟緊。行咗一陣,壞人開始慢jog,由於我嘅體力喺八仙嶺至九龍坑山已經消耗得七七八八,唯有死跟,去到城門大壩,時間1小時56分。

喺城門水塘再食幾件青瓜卷同食咗包gel,之後繼續出發,慢jog之餘,不斷望前留意壞人點樣使用行山杖,好快我哋就到達大埔道,時間51分。

飲咗水,馬不停蹄又要挑戰6.5km嘅引水道魔咒,壞人同醫師一支箭衝咗去,我擔心跑唔完keep住pacing慢慢跑,最後終於破咒一口氣跑完,但天已經黑齊,馬上戴好頭燈,飲啲水即刻上山追返佢哋,好快又已經到達沙田坳,時間1小時14分。

時間已經7點幾,因為士多快要閂門,除咗飲品連燒賣都無,我飲咗佳得樂同可樂,食埋剩餘嘅幾件青瓜卷,壞人就想馬上上路,因為去到油塘預計已10點。起步後,壞人以比我哋急步行仲快嘅速度上山,同我哋嘅距離愈拉愈遠,我同醫師無晒計,只好急急腳死跟。畢竟我有經常操練這一段路,去到飛鵝山路一段比較平坦路段,就叫醫師慢jog拉近同壞人距離。之後嘅路段,好彩我喺落山下過一番苦功,上山平路我跟唔到,就喺落山拉近返距離,去到井欄樹時間1小時34分。

「剩返9km,頂埋佢!」雖然體力仍有,但呼吸已開始散亂。油塘至沙田坳係我練習得最多嘅路段,之後我竟然成為咗領航員,雖然已經天黑,但記憶仍在,喺關鍵位置,仍可指示出正確路線。最後嘅一段,壞人問我仲可唔可以跑?我答「盡量跟喇」,但實際情況係:我未回到氣,雖然體力仍在。

最後到達油塘,時間1小時12分,醫師喺度等我,壞人已跑去地鐵站計時間。

雖然跟唔到壞人同醫師嘅pacing,但起碼,我完成咗呢個64km終極長課,而且係逆行。

PS. 壞人話最後一段慢jog係最關鍵一段,原因係:「嗰度係墳場」– 我暈了 囧rz

分段時間:
1. 南涌至仙姑峰: 1小時19分
2. 仙姑峰至九龍坑山頂: 2小時53分
3. 九龍坑山頂至碗窰 (連半小時午飯): 2小時26分
4. 碗窰至城門水塘: 1小時56分
5. 城門水塘至大埔道: 51分
6. 大埔道至沙田坳: 1小時14分
7. 沙田坳至井欄樹: 1小時34分
8. 井欄樹至油塘: 1小時12分

Total distance: 64.27 km
Max elevation: 606 m
Min elevation: 6 m
Total Time: 13:27:30
Share
This entry was posted in 越野跑, 雷利衛徑全征78km 2014 and tagged , , .

Post a Comment

You must be logged in to post a comment.