Monthly Archives: June 2014

1597078_10152305016399497_166841426_o1-150x150.jpg

[雷利練習] 太和至大尾督

  Arvid Poon

Share
Continue reading »
1597078_10152305016399497_166841426_o1-150x150.jpg

[雷利練習] 沙田坳至沙田

約好跑友尋日雷利操山,Whatsapp中話雷暴警告就取消。尋日朝我已一早起身,Whatsapp已經響個不停,我執緊嘢、貼緊Tape未得閒理,跟住就接到醫師電話,話筒一邊傳來一把啱啱瞓醒嘅沙啞聲: 「啤啤,雷暴警告喎,仲去唔去?」 「你去我就去」 「你又將個波傳番俾我」(醫師好無奈)(我原本嘅意思係:就算其他人都唔去,我哋兩條友都可以照操山,反正我都執好晒嘢囉;同埋,只揀好天去操練,比賽時落雨點算?) 結果醫師知道前進兄都去,我就叫醫師出Whatsapp,話我哋會照樣出發,其他朋友仔自行決定跟唔跟。 我喺預定時間前食住早餐等醫師,結果一個二個跑友陸續出現,一行8人,新丁班齊人(好鐘意大家都咁乾脆,唔會拖拖拉拉)。 我哋浩浩蕩蕩由黃大仙沿沙田坳道上,就喺出發地點撞到另一新丁班跑友兔兄一行朋友操練毅行,影個大合照,佢哋先行出發,我哋整理好行裝後亦跟住出發。 路線之前由醫師定好,由沙田坳出發,沿麥徑5段,經過筆架山,一直走到大埔公路,再由大埔公路轉入衛徑6段(雷利比賽路段)去城門水塘,最後去埋針草帽結束。 一起步我們幾個人已經開始習訓,上山就慢上,落山及平路就跑,輪流帶頭,之後雄哥要返轉頭照顧較慢嘅隊友,我哋就繼續向前,大約個多小時,我哋已經到達大埔公路。 因為聯絡唔到雄哥,而食嘢嗰陣開始有馬騮過嚟,我只可以食咗半個蛋糕就繼續向前,無幾耐就到咗衛徑第6段入口,呢個時候,我嘅ITB已經開始有「扯住扯住」嘅感覺。 沿衛徑6段一直走,好快就到達金山路,正當我哋向下慢jog,又撞到操毅行嘅兔兄一行跑友,原來我哋行錯咗,再加上之前有一段路出錯出口(應該由金山家樂徑出),就同佢哋一齊沿金山路行咗一段,呢個時候終於聯絡到雄哥一行隊員,講定係城門水塘等,落斜時同兔兄佢哋分開,繼續沿衛徑6段跑去。 呢個時候,ITB愈來愈痛,只好放慢速度繼續跟住隊友,最後走到水壩到達城門水塘。 遠望雄哥一行人已經到咗,大家休息咗一陣,我食埋嗰半舊未食完嘅蛋糕,飲咗支寶礦力,大家就商量之後嘅行走路線,最後決定由麥徑7段上針山後由沙田離開。 可能食唔夠嘢,上山嘅路體力消耗得好快,加上ITB痛楚加劇,上到針山山頂休息咗一陣,之後就係一連串嘅落樓梯。落到一半,ITB已經連屈腳慢跑都痛,只好將所有力量集中晒右腳,用右腳彈跳,左腳只用作輔助,一直沿住道風山路,最後終於到達排頭村。 呢日大家都玩得好盡興,其實除咗我ITB受傷之外,醫師同Rosa都身體不適,但大家無埋怨過,咬緊牙關一路堅持走落去。快慢唔係一個問題,正如雄哥話齋:大家隊友,一齊快,一齊慢,一齊去,一齊返,我有幸能夠識到呢一班跑友,感覺好滿足。   Arvid Poon

Share
Continue reading »
1597078_10152305016399497_166841426_o1-150x150.jpg

為愛同行Walk for Love 壹基金2014(深圳)健行活動

「為愛同行Walk for Love 壹基金2014(深圳)健行活動」係我第一次參加國內舉行嘅活動,全長49.8km。本來我並唔知道呢個活動,只係波哥問我話有個深圳夜晚行山活動,50km左右,問我去唔去玩,我就答應咗。 經過上幾次行山經驗,加上有補給站,所以都無帶太多嘅物品,盡量輕便,只兩包Gel,水袋入咗600ml水,並攞咗大會送嘅1支水、1支水動樂。 活動係晚上6點20分出發,由於我係陪玩參加者,並無號碼牌及晶片。一開始就過千人(應該有啩)浩浩蕩蕩出發。出發地點東部華僑城係一條石屎路面嘅斜坡,其實就係郊遊徑之類,我哋跟住一大班人群,只可以慢慢過頭,去到山頂已經天黑。我哋飲少少水,整理好裝備就繼續出發。 之後除咗一兩段短短嘅上斜,其餘都係好長嘅落斜,一開始時一大班擠得水洩不通嘅人群,喺去到第一個CP已經無咗一大堆,由於我無晶片,就係檢查站閃閃縮縮過去,攞咗紅色手帶又繼續前行。 再行一陣,行過木橋,落咗梯級就到咗水庫附近嘅公路,再行500m就到達13k嘅第一個補給站,漂亮的美眉揮住啦啦隊嘅彩球為我們加油(我最期待的畫面出現了 T.T),又閃閃縮縮的拿到黃色手帶,但補給站的朱古力已被拿清,我只攞咗香蕉、水、水動樂及3個小麵包,食咗1隻蕉、1支水動樂,麵包收埋2個,一邊食住麵包,一邊飲水就繼續向前。 再行咗一陣,攞咗山腳下派發嘅青瓜,就開始上山落山路段,呢度嘅樓梯算係比較好行,每級梯級嘅高度都差不多,亦唔算爬太高就到一段平路可以休息。到頂後,就係一小段比較難行嘅落山路段,由於人太多,有好幾次都要停低等候,山路之後就係長長嘅下山樓梯級,記得壞人教過,所以一路落一路盡量放鬆身體,盡量去休息。到山腳後,食多一個小麵包,經過一段石路,就到達23k – 第二個補給站,時間大約用咗五個小時。 呢個時候,人群已經無咗一大半,我哋可以喺呢度攞到比第一補給站更多嘅食品同飲品,但我只係攞多支水同水動樂已經足夠,再喺補給站食多一個麵包,臨出發時在旁邊看到一間小賣店,眼前一亮,就走去問有沒有啤酒賣 ^^。答案竟然係:有呀!買咗兩支冰凍啤酒,諾諾及皇上飲咗一小杯,我哋一齊飲住啤酒,如逢甘露,士氣高昂的繼續出發。 之後的廿多k都係石屎路,無乜嘢難度,沿住水庫上,好快就見到另一個CP,同樣地攞咗藍色手帶後,又繼續前行。呢個時候路面只會間中撞稀疏嘅幾班人,或一大班人瞓喺路邊,有時候甚至只得一個人行(佢哋啲隊友呢?) 之後落山一大段嘅大石路面真係攞我條命,行咗一陣,我已知道腳底被硬石整到起水泡,忍住痛繼續行到下一個補給站 – 37k。 喺37k補給站我乜都無攞,只係同波哥走咗去對面嘅士多買啤酒飲,對面補給站嘅小姐見到我,就揮手叫我過去,硬把麵包、香蕉給我,話麵包送啤酒都好好㗎(哪裡好了?白癡 ^O^),但也把麵包拿去了,這時水袋的水還未飲過,背囊仲有兩支水動樂同1支水,太足夠了。 這時露露及皇上還未到,我們無聊又同波哥、諾諾每人一支雪條,哈哈哈~(呢啲比賽太好玩喇!) 等到皇上露露到來休息一陣,又繼續出發,之後沿住水庫行又係一啲石屎路,幾個上上落落嘅山坡,到達最後一個 46.89k 嘅CP,天亦開始落大雨喇。 去到因為我又一樣走過無檢查晶片,有位小姐見到我,就叫住我遞咗一條綠色手帶俾我(好滾動 T.T) 之後我哋一行5人就冒住雨行返終點,用咗11個幾鐘。 P.S. 終點每個有證書嘅參加者都有毛巾送,我無證書只好等攞完行李再攞自己嘅毛巾抹身,點知派毛巾嘅小姐走過嚟都送一條毛巾俾我,我⋯⋯又滾動了 T.T 多謝皇上露露最後都幫我攞到一個奬牌 ^^   Arvid Poon

Share
Continue reading »
1597078_10152305016399497_166841426_o1-150x150.jpg

逆走衞徑

上星期六跟住師兄逆走衞徑,以將軍澳為終點。我哋上午八點由南涌出發,開頭都是鄉村道路,經過雷利衛徑終點位置後開始為石路,我哋開始加快速度。 直至去到7km左右位置就沿梯級走上仙姑峰,到達峰頂剛好走咗8km,第一次可以喺咁高嘅位置望到大埔慈山寺觀音像,喺峰頂休息一陣調整好呼吸,呢個時候師兄提醒我要盡量保留體力,因為之後就係要不停上山落山嘅八仙嶺。 開始時體力充足,雖然落山會被抛離一小段,但都會喺平路及上山時追返一丁點距離(心想:壞人師兄,這哪是甚麼慢腳了?!);但過咗五、六個峰後,體力消耗得好快,喺我落山嗰陣,睇到師兄們已經喺另一個山頭;過晒八仙嶺,就連佢哋嘅影都睇不到啦 >.<' 之後我已無心去睇風景,亦無心力去數算行咗幾個峰,見上坡就盡力上,見下坡平路就慢jog,一心只盡快向前行,希望將距離盡量縮短。 唔知道過咗幾多個山頭,終於見到師兄們喺平坦路段前等我。起步後,心諗:「呢段應該可以舒服啲喇啩」。不過,我又諗多咗喇,平路我仲跟得到,但一到落斜,當我以自己最快嘅速度落山,但佢哋輕輕鬆鬆幾個彈跳又已經將我抛離,心情灰到極點。 落到鶴藪水塘燒烤區,我先可以鬆一口氣,慢慢行盡量去調節亂成一團嘅呼吸。呢個時候已經有想跳車嘅衝動,不過心諗,只跟得嗰一段就跳車,弱爆了,開頭仲誇口話起碼要去到沙田坳,無傷無痛,只要仲有體力,點都要頂多一段。行咗一陣,死死哋跟住師兄上梯級開始登上九龍坑山。 上完梯級之後嗰段山路,其實並唔難行,但之前體力消耗太大,加上呼吸未順,只好聽師兄建議食咗Gel再慢慢上。 上完山路,師兄們已經等緊我,壞人師兄一邊話我攞太多嘢,一邊就將我嘅物品放入佢嘅背囊減輕我嘅負擔(感激 T.T),提醒我跟住落嚟嗰2km上斜好甘。其實當時我已經感覺唔到甘唔甘,只係見路就行,見坡就上,上到九龍坑山山頂已經見到師兄喺度,感覺又好似無之前咁辛苦(可能因為行得慢 ^^),之後又開始落山路段。 落咗一段,見壞人師兄喺前面等我,話睇我點樣落斜,之後佢一直跟住我,喺落山路就指點我不足嘅地方,落樓梯又教我要點休息鬆弛,跟住走咗一段之後,發覺我嘅ITB已經開始隱隱作痛,一直死頂支持到大埔頭村,嗰陣連慢jog都會覺得痛,就同師兄喺太和食完午餐之後跳車,全程22km。 雖然師兄同我講我已經完成咗衞徑最難嘅路段,逆走係比較困難,但我知道如果要跟朋友組隊參加雷利,我嘅Level仲係差太遠喇,好彩仲有時間,希望快啲醫好ITB,多啲同朋友去操練,唔係話要去攞好成績,但起碼可以有足夠完成賽事嘅體能。 P.S.: 同朋友講開,原來師兄們都係苗圃冠軍級人馬‧‧‧‧‧‧不過難得佢哋俾我呢啲山路初哥參加佢哋嘅操練,要學嘅嘢仲有好多好多‧‧‧‧‧‧   Arvid Poon

Share
Continue reading »